මෙරට පොදු ජාතික අරමුණුවල (1992) දැක්වෙන ආකාරයට පුද්ගලයින් මානසික හා ශාරීරික සුව සම්පත හා මානව අගයන්ට ගරු කිරීම මත පදනම් වූ තිරසර ජීවන ක්‍රමයක් ප්‍රවර්ධනය කිරීම මගින් අධ්‍යපනයෙන් ඉටු කර ගැනීමට අපේක්ෂිත ඉලක්කය පැහැදිලි වේ. සෞඛ්‍ය ඉගැන්වීම මගින් ශිෂ්‍යයා යොමු කරනු ලබන මූලික ක්ෂේත්‍ර අතර ධනාත්මක ව ජීවන අභියෝගවලට මුහුණ දීම මගින් සෞඛ්‍යවත් සමාජයක් ගොඩ නැංවීමට උත්සාහ කරයි. එමෙන් ම පෞද්ගලික ස්වස්ථතාව වර්ධනය කිරීම, සෞඛ්‍ය අධ්‍යාපනයේ තවත් අරමුණක් වේ. අසිරිමත් සිරුර පිළිබඳ අධ්‍යයනය කිරීම හා රැක ගැනීම, සතුට හා තෘප්තිය ලබා ගැනීම, සහයෝගයෙන් කටයුතු කිරීම, ජීවිත අභියෝගවලට ධනාත්මක ව හා සාර්ථක ව මුහුණ දීමට, ආචාරධර්මවලට ගරු කරමින් යහ පැවැත්ම ඇති කර ගැනීම, විවේකය ඵලදායී ව ගත කිරීම, ජීවිතය ඵලදායි හා කාර්යක්ෂම කර ගැනීම යනාදී නිපුණතා සංවර්ධනය කර ගැනීම සෞඛ්‍ය හා ශාරිරික අධ්‍යාපන විෂයයේ අරමුණු වේ.
1-9 ශ්‍රේණිය දක්වා සෞඛ්‍ය හා ශාරීරික අධ්‍යාපනය අනිවාර්ය විෂයයක් ලෙස ක්‍රියාත්මක වන අතර, 1-5 ශ්‍රේණිවල පරිසරය ආශ්‍රිත ක්‍රියාකාරකම් විෂයය සමග සමෝධානය කර ඇත. 6-9 ශ්‍රේණිවල අනිවාර්ය අධ්‍යාපනය, තොරතුරු සහ සන්නිවේදන තාක්ෂණය, කෘෂි හා ආහාර තාක්ෂණය විෂය ක්‍රියාත්මක වන අතර සෞඛ්‍ය හා ශාරීරික අධ්‍යාපන විෂය තෝරා ගැනීමේ ස්වභාවය පිළිබඳ ගැටලු පවතී.
අධ්‍යාපනය සන්ධාර විශ්ලේෂණය යටතේ සිදු කිරීම සහ ඒ සදහා ගුරු අත්පොත් සහ පෙළපොත් පමණක් විශ්ලේෂණයට ලක් කිරීම, කායික යහ පැවැත්ම, මානසික යහ පැවැත්ම, සමාජීය යහ පැවැත්ම, සහ ආධ්‍යාත්මික යහ පැවැත්ම අතරින් කායික යහ පැවැත්ම පමණක් අධ්‍යයනය සදහා තෝරා ගැනීම, කායික යහ පැවැත්ම අතරින් කායික රෝගවලින් මිදීම පිළිබද පමණක් අධ්‍යයනයට ලක් කෙරේ. මෙම අධ්‍යයනය අරමුණ තුනක් ඔස්සේ සිදු කෙරේ.
01 සෞඛ්‍ය හා ශාරීරික අධ්‍යාපන විෂය නිර්දේශයෙන් කායික රෝග පිළිබද ව ලබා දෙන දැනුම්වත් බව අධ්‍යය කිරීම
02 විෂය නිර්දේශයෙන් කායික රෝග පිළිබඳ ලබා දෙන ආකල්ප හදුන්වා ගැනීම
03 විෂය නිර්දේශය කායික රෝග නිවාරණය සදහා දී ඇති කුසලතා අධ්‍යයනය කිරීම
‘ජීවිතයේ හමුවන බාධකවලට සාර්ථක ව මුහුණ දෙමින් ප්‍රීතිමත් දිවියක් ගත කරයි’ යන නිපුණතාව යටතේ සහ ‘යහපැවැත්ම උදෙසා අභියෝගවලට සාර්ථක ව මුහුණ දෙයි’ යන නිපුණතා මට්ටම යටතේ කායික රෝග පිළිබඳ ව සිසුන්ට දැනුම ලබා දී ඇත. බෝ වන හා බෝ නො වන රෝගවලට හේතු, ඒවා වළක්වා ගැනීම, පිළිබඳ 6, 7, 9, 11 ශ්‍රේණිවල දී සාකච්ඡා කෙරෙන අතර, සරල සංකල්පවල සිට සංකීර්ණ සංකල්ප දක්වා ගමන් කිරීම සිදු වේ. සිරස් සමෝධානය සහිත ය. ඩෙංගු, කොරෝනා, වැනි වසංගත රෝග සහ ලිෂ්මයිනීස් වැනි රෝග පිළිබද ව අඩු බර තැබීමක් සිදු වන ඇත.
කායික රෝගවලින් තොර වීම සදහා ආවේදන ඇති කිරීම, කායික රෝග වළක්වා ගැනීමට, රෝගවලින් වැළකී සිටීමට සුදුසු ආවේදන අරමුණු සිසුන් තුළ සංවර්ධනය කිරීමට විෂය මාලාවෙන් උත්සාහ ගෙන ඇත. කුසලතා ලෙස සංජානනය, සූදානම, පාලිත ප්‍රතිචාර, යාන්ත්‍රණය, සංකීර්ණ ප්‍රකට ප්‍රකාශිත ප්‍රතිචාර, අනුවර්තනය, ප්‍රතිභාව යන අංශ කෙරෙහි විෂය මාලාවෙන් අවධානය යොමු කර ඇත. සෞඛ්‍ය හා ශාරීරික අධ්‍යාපනය විෂය මාලාව කායික රෝග පිළිබද ව දැනුම ආකල්ප කුසලතා අත්පත් කර දීමට හැකි වන අයුරින් සකස් කර ඇත. 6-9 ශ්‍රේණිවලින් පසු ව සියලු ම සිසුන් සදහා පොදු විෂයයක් ලෙස ඉගැන්වීම සිදු නො වන නිසා විෂය තුළින්, බෝ වන රෝග ඇති වීමට හේතු, බෝ වන රෝග වළක්වා ගැනීම, වැලි මැක්කා වැනි කෘමීන් නිසා ඇති වන ලිෂ්මනයිසීස් වැනි රෝග පිළිබද ව දැනුම, ආකල්ප කුසලතා අත්පත් කර දීම මගින් එම රෝග වළක්වා ගැනීමට හැකියාව ලැබේ. මෙම විෂය නිර්දේශ සකස් කිරීමෙන් අනතුරු ව ලොව පුරා ව්‍යාප්ත වූ කොරෝනා වෛරසයට අදාළ ව විෂය නිර්දේශය යාවත්කාලීන විය යුතු ය.
ආර්. බී. අමිලා සංජීවනී
කළමනාකරු
ගුරු වෘත්තීය සංවර්ධන මධ්‍යස්ථානය
ගලෙන්බිඳුණුවැව