** ඔබ ව්‍යාපාරයක් ආරම්භ කරනවා නම් පාරිභෝගික තෘප්තිය අංක එක බව මතකයේ තබා ගන්න**
ගසක් සවියෙන් ශක්තිමත් වීමට නම් හොඳින් මුහුකුරා ගිය මුඳුන් මුලක් තිබිය යුතු ම ය. එ අනුව, සාර්ථක ව්‍යාපාරයක මූල බීජය පාරිභෝගික තෘප්තියයි. මේ නිසා, විවිධ කාලවල දී ව්‍යාපාරවලට සම්බන්ධ ගනුදෙනුකරුවන්ගේ අවශ්‍යතා සහ ප්‍රතිචාර පිළිබඳ ව විමසිලිමත් ලෙස සලකා බැලීමට ප්‍රමුඛත්වයක් ලබා දිය යුතු ය. වර්තමානයේ, පාරිභෝගිකයන් වැඩි ප්‍රවේශමක් සහ විමසිල්ලක් සහිත ව කටයුතු කරති. මන්ද, විවිධ තෝරා ගැනීම් අතරින් ඔවුහූ තමන්ගේ අවශ්‍යතා සපුරාලන ව්‍යාපාර පමණක් තෝරා ගනිති. මෙය ව්‍යාපාර සඳහා අභියෝගයක් වුණත්, සාර්ථක ව්‍යාපාර, පාරිභෝගික තෘප්තිය ඉහළ නංවා ගෙන කටයුතු කිරීමට විවිධ අයුරින් උත්සාහ කරති.
තමන්ගේ වියදම ගැන පමණක් සිතන පාරිභෝගික පිරිසක් නිර්මාණය වීම යනුවෙන් ඇඟවෙන්නේ, පාරිභෝගික තෘප්තිය යනු හුදෙක් නාමමාත්‍රයක් පමණක් වන බවයි. ව්‍යාපාරික ලෝකයේ සෑම ව්‍යාපාරයක් ම රැඳී පවතින්නේ පාරිභෝගිකයන් මතයි; ඔවුන්ගේ තෘප්තිමත්භාවය මතයි. ව්‍යාපාරික ‘බ්‍රෑන්ඩ්’ එක, එහෙමත් නැතිනම්, ‘කීර්ති නාමය’ පළුදු නො වී රඳවා ගැනීමට, වෙළඳ පිරිස නව තරගකාරී ලෝකයේ මහත් උත්සාහයක් ගනියි. රූපවාහිනී තිරය මත මඳක් ඔබ බලා සිටින්න. එහි යන වෙළෙඳ දැන්වීම් ප්‍රමාණය කොතෙක් ද යන්න, මම ඔබට අමුතුවෙන් කිව යුතු නැත. නමුත්, ඔබ මතකයෙහි සටහන් වන්නේ කොපමණ ප්‍රමාණයක් ද? ඇසට ඉතාමත් ප්‍රිය, කනට ඉතාමත් මිහිරි දෑ පමණක් ඉක්මනින් ඔබ මතකයෙහි සටහන් වෙයි. ඒ කෙසේ වුවත් වෙළඳ දැන්වීමක දකින දේටත් වඩා, අප ළඟින් ඇසුරු කරන පුද්ගලයකු පවසන වෙළඳ භාණ්ඩයක් මිල දී ගැනීමට අප කිසිසේත් පැකිලෙන්නේ නැත. උදාහරණයක් ලෙස, ඔහු/ඇය නිර්දේශ කරනවා නම් යම් රූපලාවණ්‍ය භාණ්ඩයක් – කෑමක් – හෝ වෙන යම් දෙයක්, අප එය නිසැක ව ම මිල දී ගන්නේ නැති ද? එය නොවේ ද යම් ව්‍යාපාරයක සාර්ථකත්වය?
වෙළඳ දැන්වීමක් ප්‍රචාරණය කරනවාට වඩා ඉතා ඉක්මනින්, යම් වෙළෙඳ සන්නාමයක් පාරිභෝගික අදහස් පදනම් කර ගෙන සමාජගත කළ හැකි ය. අනෙක් අතට යම් ව්‍යාපාරයක් පිළිබඳ ව ඇති වන සෘණාත්මක අදහසක් ධනාත්මක අදහසකට වඩා ප්‍රබල වේ. මන්ද යත්, වර්තමාන සමාජයේ කළ හොඳ දස දහසක් අතරින් එක අල්පමාත්‍ර නරක යමක් සමාජගත වීමට ඇති ඉඩකඩ බොහෝ සෙයින් වැඩි ය. සිතන්න, කෙනෙක් ඔබට පවසනවා නම්,
“අනේ ඒ කෑම කන්න බෑ”
“ඒ නිෂ්පාදිතය හරි නෑ”
“ඒ අවන්හලේ කිසිදු පිරිසිදුකමක් නෑ” යන කරුණු…
එසේ නම් තවත් ඔබ ඒ නිෂ්පාදිතය හෝ කෑම මිල දී ගන්නවා ද? ඒ අවන්හලට යනවා ද? ඉතින් මේ තමයි පාරිභෝගික තෘප්තිය. නූතන ලෝකයේ සමාජ මාධ්‍යය යනු ඉතා ප්‍රබල ආයුධයකි. එසේ නම් කලින් සඳහන් කළ අයුරින් සෘණාත්මක අදහස් සමාජ මාධ්‍ය හරහා ප්‍රචලිත වුව හොත් කුමක් වේවි ද යන්න ගැන මා ඔබට අමුතුවෙන් කිව යුතු නො වේ.
ගෝලීය වශයෙන් ගත්ත ද, ශ්‍රී ලාංකික වෙළඳ ව්‍යාපාර සම්බන්ධයෙන් විදේශීය පාරිභෝගික තෘප්තිය ඉතා ඉහළ මට්ටමක ඇත. මෙරට ඇති සුන්දරත්වය විඳින්නට වගේ ම, ඔවුන්ගේ පාරිභෝගික තෘප්තිමත්භාවය ඉහළ මට්ටමක ඇති නිසා, විදේශීය සංචාරක පිරිසගේ මෙරටට ඇති ආකර්ෂණය වැඩි වී ඇත. ආගන්තුක සත්කාරවලට බොහෝ සෙයින් මුල් තැනක් දෙන ශ්‍රී ලාංකික ප්‍රජාව, එය වෙළඳ ව්‍යාපාරවල සාර්ථකත්වය උදෙසා ද හොඳ පාරිභෝගික සේවයක් ලබා දීම සඳහා ද, පෙරවදනක් ලෙස වෙනස් වන ලෝකය තුළ රුකුලක් කර ගෙන ඇත. ඒ වගේ ම අවන්හල් සහ සංචාරක සේවා සපයන ආයතන, විශේෂයෙන් ම විදේශීය පාරිභෝගිකයින් සඳහා විශේෂ අත්දැකීම් ලබා දෙමින්, ඔවුන්ගෙන් වැඩි ම තෘප්තියක් අරමුණු කරති. කෙසේ වුවත් ගෝලීය පාරිභෝගික තෘප්තිමත් දර්ශකවල තවමත් ශ්‍රී ලංකාව මධ්‍යස්ථ ව ශ්‍රේණිගත වී ඇත. ඒ වගේ ම ශ්‍රී ලංකාවේ සේවා ව්‍යාපාර, පාරිභෝගික අභිප්‍රාය අධික කර ගැනීම සඳහා, සේවා පියසර වැනි උපාය මාර්ගික උත්සාහ ගනිමින් සිටියි. තව ද නව තාක්ෂණය සහ අන්තර්ජාල අලෙවිය මගින් පාරිභෝගිකයන්ට ඉක්මන් සහ පහසු සේවා ලබා දෙමින්, පාරිභෝගික තෘප්තිය ඉහළ දැමීම, නව ප්‍රවණතාවක් බවට පත්වෙමින් පවතියි.
ඒ වගේ ම හොඳ පාරිභෝගික සේවයක් සෑම වෙළඳ ව්‍යාපාරයකින් ම සෑම වෙළඳ භාණ්ඩයකින් ම ලබා දීමටත් සියලු වෙළඳ ව්‍යාපාරිකයන් වග බලා ගත යුතු ය. සෑම අවස්ථාවක ම පාරිභෝගිකයන් තම වටිනා ම සම්පත බව ඔවුන්ට පසක් වීමට සැලැස්වීමෙන් හොඳ වෙළඳ සන්නාමයක් දීර්ඝ කාලීන ව ව්‍යාපාරිකයන්ට ලබා ගත හැකි ය. දිනෙක ඔබත් යම් වෙළඳ ව්‍යාපාරයක් ආරම්භ කිරීමට සිතනව ද? එසේ නම් පාරිභෝගික තෘප්තිය අංක 1 ලෙස ඔබේ මතකයේ සටහන් කර තබා ගැනීම ඉතා වැදගත් වේ.
ආර්. ආර්. ශලිනි මධුෂානි
වාණිජ හා කළමනාකරණ පීඨය
ශ්‍රී ලංකා නැගෙනහිර විශ්වවිද්‍යාලය